سعودی عرب سے پاکستانی ملازمین کے لئے خوشی کی خبر سامنے آگئی، سعودی عرب کی میگا پاور اور تعمیراتی کمپنی الفنار کے سی ای او صباح المطلق کا کہنا ہے کہ ہم اپنے آنے والے منصوبوں میں مزید پاکستانیوں کو ملازمتیں فراہم کرنے کے لئے کوشاں ہیں۔
بین الاقوامی خبر رساں ادارے کی رپورٹ کے مطابق نگراں وزیراعظم کے معاون خصوصی برائے سمندر پار پاکستانیوں اور انسانی وسائل کی ترقی سے متعلق جواد سہراب ملک سے ملاقات میں صباح المطلق کا کہنا تھا کہ ہم پاکستانی افرادی قوت کے اعلیٰ معیار اور سعودی عرب میں ان کے تعاون سے بے حد متاثر ہیں۔
وزارت اوورسیز پاکستانیز کی جانب سے جاری کردہ پریس ریلیز کے مطابق نگراں وزیر اعظم کے معاون خصوصی برائے سمندر پار پاکستانیز اور انسانی وسائل کی ترقی جواد سہراب ملک کمپنی کے ہیڈ کوارٹر پہنچے، اس موقع پر ان کا شاندار استقبال کیا گیا۔
الفانار تعمیراتی کمپنی کے سی ای او صباح المطلق کا کہنا تھا کہ ”ہم مستقبل کے منصوبوں کے لیے بھی مزید پاکستانی کارکنوں کو ملازمت دینے کے منتظر ہیں، ہم پاکستانی افرادی قوت کے اعلیٰ معیار اور مملکت سعودی عرب کی معیشت میں ان کے تعاون سے بہت متاثر ہیں“۔
جواد سہراب ملک نے اس موقع پر کہا کہ پاکستانی حکومت سعودی عرب کے ساتھ اقتصادی تعلقات کو مزید مضبوط بنانے اور دونوں ممالک کیلیے باہمی طور پر فائدہ مند مواقع پیدا کرنے کیلیے انتہائی پرعزم ہے۔
اُن کا کہنا تھا کہ پاکستان میں انجینئرنگ، آئی ٹی، ہیلتھ کیئر، مہمان نوازی سمیت مختلف شعبوں میں ہنر مند و تجربہ کار پیشہ ور افراد کی بڑی تعداد موجود ہے اور یہ افراد اہم کردار ادا کر سکتے ہیں۔
Source link
www.suchtv.pk