اداکارہ نے اپنی فلم سابق شوہر کے نام کرکے مداحوں کو حیرت میں ڈال دیا

اداکارہ فریال محمود نے کہا ہے کہ وہ جلد ہی ریلیز ہونے والی اپنی فلم ’وکھری‘ سابق شوہر کے نام کرنا چاہیں گی، جنہوں نے انہیں زندگی کے بہت سبق سکھائے اور انہیں مضبوط بنانے میں کردار ادا کیا۔

فریال محمود نے مارچ 2022 میں اپنی شادی طلاق پر ختم ہونے کی تصدیق کی تھی، انہوں نے کورونا کی وبا کے دوران مئی 2020 میں اداکار دانیال راحیل سے خاموشی سے شادی کرلی تھی۔

اداکارہ جلد ہی ’وکھری‘ نامی بولڈ فلم میں ایکشن میں دکھائی دیں گی، جسے پاکستان بھر میں آئندہ ماہ جنوری میں ریلیز کیے جانے کا امکان ہے۔

فریال محمود نے انسٹاگرام پر ’وکھری‘ فلم کے اپنے کردار کی تصویر اور فلم ہدایت کارہ ارم پروین بلال کی جانب سے شوبز ویب سائٹ ڈیڈ لائن سے بات کرنے کی ویڈیو کو شیئر کرتے ہوئے بتایا کہ انہوں نے وہ اپنی ریلیز ہونے والی فلم سابق شوہر کے نام کرنا چاہیں گی۔

 اداکارہ نے اپنی لمبی چوڑی پوسٹ میں مداحوں کو بتایا کہ جیسا کہ وہ سب جانتے ہیں کہ وہ ٹی وی سے کچھ عرصے سے دور ہیں لیکن جلد ہی وہ بڑے پردے پر دکھائی دیں گی اور یہ کہ وہ اس بار پہلے سے زیادہ منجھے ہوئے کردار میں نظر آئیں گی۔

انہوں نے لکھا کہ جیسا کہ ان کی زندگی سے متعلق ہر کوئی جانتا ہے کہ انہوں نے کتنی مشکلات کا سامنا کیا، ان کی زندگی کیسے گزری، انہیں کس قدر سوشل میڈیا پر جسامت اور وزن سے متعلق ٹرولنگ کا سامنا کرنا پڑا، پھر ان کی شادی اور طلاق پر بھی کس طرح ان کے خلاف باتیں کی گئیں۔

اداکارہ نے لکھا کہ انہیں اس قدر ٹرولنگ کا نشانہ بنایا گیا کہ انہوں نے رقیب سے ڈرامے کے بعد اپنا پرانا سوشل میڈیا اکاؤنٹ ہی ڈیلیٹ کردیا تھا۔

انہوں نے لکھا کہ ان تمام باتوں کے باوجود وہ کبھی مایوس نہیں ہوئیں، انہوں نے خود سے اور اپنے مخلص مداحوں سے وعدہ کر رکھا تھا کہ وہ پہلے سے بہتر ہوکر سامنے آئیں گی۔

فریال محمود نے اپنی پوسٹ میں خواتین کو مخاطب ہوتے ہوئے لکھا کہ جو خواتین گھروں سے نکل سکتی ہیں، وہ انہیں یہ درخواست کریں گی وہ سینما جاکر لازمی ’وکھری‘ دیکھیں، وہ مایوس نہیں ہوں گی، انہیں فلم میں اپنی کہانی نظر آئے گی۔

اداکارہ نے مداحوں کو بتایا کہ ’وکھری‘ کو پاکستان میں 5 جنوری 2024 کو ریلیز کیا جائے گا۔

فریال محمود نے پوسٹ کے اختتام پر لکھا کہ ان کی فلم ان کے سابق شوہر کی سالگرہ کے دن پر ریلیز ہوگی اور وہ چاہیں گی کہ وہ مذکورہ فلم کو اپنے سابق شوہر کے نام کریں۔

انہوں نے ذو معنی الفاظ میں لکھا کہ انہیں سابق شوہر نے بہت سبق سکھائے، انہیں اپنے لیے لڑنا سکھایا، جس وجہ سے وہ آج اپنی ذات کے لیے لڑ رہی ہیں۔

فریال محمود نے لکھا کہ وہ سابق شوہر کی بہت مشکور ہیں، جنہوں نے انہیں بہتر ہونا اور اپنے لیے لڑنا سکھایا اور یہ کہ وہ ان کے سکھائے گئے سبق کبھی نہیں بھولیں گی۔

خیال رہے کہ وکھری فلم میں فریال محمود سوشل میڈیا اسٹار کے کردار میں نظر آئیں گی، جنہیں بولڈ انداز کی وجہ سے ٹرولنگ اور تنقید کا سامنا بھی رہتا ہے۔