بابراعظم نے ایک اور منفرد اعزاز اپنے نام کر لیا

سابق کپتان بابراعظم نے آسٹریلیا کے خلاف ٹیسٹ سیریز کے پہلے میچ کے دوران بڑا سنگ میل عبور کرلیا، 13 ہزار انٹرنیشنل رنز بنانے والے پانچویں پاکستانی کرکٹر بن گئے۔

بابر اعظم 301 اننگز میں یہ سنگ میل حاصل کرتے ہوئے پاکستانی بیٹرز میں سب سے جلد یہ اعزاز حاصل کرنے والے کھلاڑی بن گئے ہیں۔ اس سے قبل یہ ریکارڈ جاوید میانداد کے پاس تھا جنھوں نے 305 اننگز میں 13 ہزار رنز بنائے تھے

اس کے بعد محمد یوسف نے 322 اننگز میں، انضمام الحق نے 352 اننگز میں جبکہ یونس خان نے 372 اننگز میں یہ ریکارڈ اپنے نام کیا تھا۔

اب 29 سالہ بابر بھی ان پاکستانی بیٹرز میں شامل ہو گئے ہیں جنھوں نے بین الاقوامی کرکٹ میں 13000 رنز بنائے ہیں۔ انضمام الحق 20,541 رنز کے ساتھ سرفہرست ہیں، اس کے بعد یونس خان 17790، محمد یوسف 17134، جاوید میانداد 16213 اور بابر اعظم 13007 موجود ہیں۔

سابق کپتان نے اپنے 8 سالہ کیریئر کے دوران 50 ٹیسٹ، 117 ون ڈے اور 104 ٹی ٹوئنٹی میں پاکستان کی نمائندگی کی ہے۔ وہ کھیل کے تمام فارمیٹس میں 49.08 کی متاثر کن اوسط رکھتے ہیں جبکہ انھوں نے 31 سنچریاں اور 81 نصف سنچریاں اسکور کررکھی ہیں۔

واضح رہے کہ پرتھ ٹیسٹ کی پہلی اننگز میں بابراعظم 21 رنز بناکر آؤٹ ہوئے تھے جبکہ دوسری اننگز میں انھوں نے محض 14 رنز اسکور کیے تھے۔