ویڈیو، دورانِ پرواز مسافر طیارے کا دروازہ ٹوٹ گیا

الاسکا ایئر لائنز کے طیارے نے پورٹلینڈ انٹرنیشنل ایئرپورٹ پر ہنگامی لینڈنگ کی، دوران پرواز طیارے کا دروازہ ٹوٹ گیا جس کی ویڈیو سوشل میڈیا پر وائرل ہوگئی ہے۔

غیر ملکی خبر رساں اداروں کی رپورٹس کے مطابق 5 جنوری کی رات الاسکا ائیرلائنز کی بوئنگ 737 نے پورٹ لینڈ سے اڑان بھری، اڑان بھرنے کے کچھ ہی دیر بعد مسافر طیارے کا درمیانی دروازہ ٹوٹ کر جہاز سے الگ ہوگیا۔

پورٹ لینڈ انٹرنیشنل ایئرپورٹ پر الاسکا ایئر لائنز کی پرواز کی ہنگامی لینڈنگ کی گئی، رپورٹ میں بتایا گیا کہ پرواز کو شدید پریشر کا سامنا کرنا پڑا، جس کی وجہ سے دروازے کا ایک بڑا حصہ اور ایک خالی سیٹ ٹوٹ گئی۔

?#BREAKING: Alaska Airlines Forced to Make an Emergency Landing After Large Aircraft Window Blows Out Mid-Air ⁰⁰?#Portland | #Oregon
⁰A Forced emergency landing was made of Alaska Airlines Flight 1282 at Portland International Airport on Friday night. The flight, traveling… pic.twitter.com/nt0FwmPALE

— R A W S A L E R T S (@rawsalerts) January 6, 2024

طیارے میں سوار ایک مسافر نے بتایا کہ لینڈنگ کے دوران ہوا بہت تیز تھی، لیکن تمام مسافر اپنی سیٹوں پر بیٹھے اور بیلٹ باندھے ہوئے تھے۔

ایک اور مسافر نے اس پرواز کے سفر کو ’trip to hell‘ قرار دیتے ہوئے کہا کہ تیز ہوا کے دباوٗ کی وجہ سے ان کا موبائل فون بھی باہر گر گیا۔

طیارے میں 171 مسافر اور 6 کریو ممبرز سوار تھے، واقعے میں کوئی شخص زخمی نہیں ہوا اور طیارے کو 16 ہزار 325 فٹ کی بلندی پر پہنچنے کے بعد بحفاظت واپس لینڈ کرا لیا گیا۔

ویڈیو میں دیکھا جاسکتا ہے کہ طیارے میں موجود مسافروں نے آکسیجن ماسک پہنے ہوئے ہیں اور ٹوٹے ہوئے دروازے سے آسمان صاف ظاہر ہے۔

امریکی ٹرانسپورٹیشن سیفٹی بورڈ کی جانب سے کہا گیا ہے کہ واقعے کی تفتیش کر رہے ہیں بعدازاں امریکی ایئر لائن ریگولیٹر نے بعض بوئنگ 737 طیاروں کو گراؤنڈ کرنے کا حکم دے دیا۔