سعودی عرب میں ملازمتوں سے متعلق اہم خبر آگئی

سعودی وزارت افرادی قوت و سماجی بہبود نے اہم فیصلہ کرتے ہوئے چھ ممالک سے گھریلو ملازمین کی ریکروٹنگ لاگت کی انتہائی حد میں کمی کردی ہے۔

بین الاقوامی خبر رساں ادارے کی رپورٹ کے مطابق وزارت افرادی قوت کا اپنے بیان میں کہنا تھا کہ ’بدلتے ہوئے حالات کے پیش نظر فلپائن، سری لنکا، بنگلہ دیش، یوگنڈا، کینیا اور ایتھوپیا سے درآمد کی لاگت کی انتہائی حد کم کی گئی ہے۔‘

وزارت افرادی قوت کے بیان میں کہا گیا ہے کہ’بنگلہ دیش سے 13 ہزار سے کم کرکے 11750 ریال، کینیا سے دس ہزار 870 سے کم کرکے نو ہزار، یوگنڈا سے ساڑھے نو ہزار کے بجائے 8300 ریال اور ایتھوپیا سے 6900 سے کم کرکے 5900 ریال مقرر کی گئی۔‘

’فلپائن سے گھریلو عملے کی درآمد کی لاگت 15900 ریال سے کم کرکے14700، سری لنکا سے 15 ہزار سے کم کرے 13800 ریال کردی گئی ہے۔‘

اس سے قبل وزارت افرادی قوت نے ریکروٹنگ کمپنیوں اور ایجنسیوں کے لیے بعض ممالک سے گھریلوعملے کی درآمد کی لاگت کی انتہائی حد مقرر کی تھی۔

وزارت نے سیرالیون، برونڈی سے 7500 ریال جبکہ تھائی لینڈ سے 10 ہزار ریال انتہائی حد مقرر کی ہوئی ہے۔ اس میں ویلیو ایڈڈ ٹیکس کو شامل نہیں کیا گیا ہے۔