امبانیز کی تقریب میں پاکستانی ڈیزائنرز کی دھوم

ممبئی (این این آئی)بھارتی بزنس ٹائیکون مکیش امبانی کے چھوٹے بیٹے اننت امبانی کی پری ویڈنگ فیسٹیویٹیز میں بالی وڈ ستاروں نے پاکستانی فیشن ڈیزائنرز کے ملبوسات میں حسن کے جلوے بکھیر دیئے۔ ریلائنس انڈسٹریز کے چیئرمین مکیش امبانی نے معروف بزنس ٹائیکونز، اسپورٹس اسٹارز اور بالی ووڈ کی مشہور شخصیات کو گجرات کے جام نگر میں تین روزہ جشن میں مدعو کیا۔ ستاروں سے سجے اس جشن میں بالی ووڈ کی چند مشہور شخصیات نے پاکستانی ڈیزائنرز کے لباس پہننے کو ترجیح دی۔

سونم کپور، رنبیر کپور اور ارجن کپور سمیت مشہور اداکاروں کو پاکستان کے معروف ڈیزائنر فراز منان اور حسین ریہر کے لباس میں دیکھا گیا۔ شاہد کپور کی اہلیہ میرا کپور نے بھی فراز منان کا لباس پہنا اور اپنے شاہکار میں ملبوس بالی وڈ ستاروں کی تصاویر فراز منان نے انسٹاگرام پر شیئر کیں۔ خیال رہے کہ یہ پہلی مرتبہ نہیں کہ بالی وڈ سپر اسٹارز نے بھارتی فیشن ڈیزائنر کی جگہ پاکستانی فیشن ڈیزائنر کا انتخاب کیا ہے بلکہ ماضی میں کرینہ کپور، سری دیوی، کیارا اڈوانی اور شاہ رخ خان بھی پاکستانی ڈیزائنرز کے لباس پہن چکے ہیں۔