جامعہ بنوریہ عالمیہ کا ایک اور تاریخی اقدام ،مدارس کا پہلا پرفارمنس مینجمنٹ سسٹم متعارف کرا دیا

کراچی ( ڈیلی پاکستان آن لائن )بین الاقوامی  دینی درسگاہ جامعہ بنوریہ عالمیہ نے مدارس دینیہ کے لیے پہلا پرفارمنس مینجمنٹ سسٹم متعارف کرادیا ، اس حوالے سےخصوصی تقریب کا انعقاد کیا گیا، یہ نظام بنوریہ کے 63 شعبوں اور 768 ملازمین کےلئے پہلے سے ہی نافذ ہے جبکہ تقریب میں جامعۃ الرشید اور دیگر مدارس میں بھی اسے نافذ کرنے کا اعلان کیا گیا۔تقریب سے خطاب کرتے ہوئے جامعۃ الرشید کے سرپرست اعلیٰ مفتی عبدالرحیم نے اس نظام کی تیاری اور تنفیذ کو سراہتے ہوئے کہا کہ “جامعہ بنوریہ عالمیہ کا یہ اقدام منفرد، تاریخی اور وقت کی ضرورت ہے، یہ دیگر تعلیمی اداروں کےلئے مشعل راہ ہے، اس کی تیاری پر جامعہ بنوریہ کی انتظامیہ کو خراج تحسین اور مبارکباد پیش کرتاہوں۔
جامعہ بنوریہ عالمیہ کے رئیس ڈاکٹر مولانا نعمان نعیم نے نظام کی اہمیت اور افادیت پر زور دیتے ہوئے کہاکہ “مدارس دینیہ کے لیے پرفارمنس مینجمنٹ سسٹم تکمیل کو پہنچا جو یقینا تاریخی اقدام ہے جس پر میں اپنے رفقاء کو مبارکباد پیش کرتاہوں جامعہ میں پہلے ہی یہ نظام رائج ہے اب اس کو جامعۃ الرشید اور دیگر مدارس میں بھی جلد نافذ کیا جائے گا۔
جامعہ بنوریہ عالمیہ کے ناظم تعلیمات مولانا عبدالحمید خان غوری نے کہاکہ یہ نظام مدارس کی ترقی و خوشحالی کی ضمانت ہوگی، مدارس دینیہ کے لیے ایک اہم پیش رفت ہے۔ جس سے مدارس کو اپنی کارکردگی کو بہتر بنانے اور جدید خطوط پر چلانے میں مدد ملے گی۔

مشیر رئیس جامعہ، شاہد صدیقی نے شرکاء تقریب کو اس نظام سے متعلق بریفنگ دیتے ہوئے کہا کہ “اس نظام سے ادارے منظم انداز میں آگے بڑھ سکیں گے، اہداف کا تعین، کارکردگی کا جائزہ، اور فیڈ بیک کے ذریعہ شعبہ جاتی ملازمین کو ترقی کے مواقع میسر آئیں گے، وقت، وسائل کا تخمینہ آسان ہوگا، کوالٹی ایشورنس اور بنچ مارکنگ کا نظام متحرک ہوگا اور اس نظام سے شعبوں اور ملازمین کی کارکردگی کا جائزہ لینا آسان ہوگا۔
تقریب میں جامعہ بنوریہ عالمیہ کے 63 شعبہ جات کے مسؤلین اساتذہ حدیث،،جامعۃ الرشید کراچی کے سینئر اساتذہ کرام اور مدارس منتظمین شریک تھے۔