انسداد پولیو ایک قومی مقصد ہے جس کیلئے ہم سب متحد ہیں،نگران وزیراعظم انوار الحق کاکڑ

اسلام آباد (ڈیلی پاکستان آن لائن)نگران وزیراعظم انوار الحق کاکڑ کا کہنا ہے کہ انسداد پولیو ایک قومی مقصد ہے جس کیلئے ہم سب متحد ہیں، پولیو ویکسین پلانے کیلئے ہمیں ہر بچے تک پہنچنا ہے

اسلام آباد میں  انسداد پولیو کے عالمی دن کے حوالے سے منعقدہ تقریب سے خطاب میں ان کا کہنا تھا کہ پولیو سمیت معاشرے سے تمام منفی رویوں کا خاتمہ ہماری اولین ترجیح ہے، انسداد پولیو ایک قومی مقصد ہے جس کیلئے ہم سب متحد ہیں، پولیو ویکسین پلانے کیلئے ہمیں ہر بچے تک پہنچنا ہے، پاکستان میں ترقیاتی شراکت داروں کے ساتھ مل کر انسداد پولیو اور زچہ و بچہ کے علاج کیلئے مؤثر اقدامات کئے جا رہے ہیں، انسداد پولیو مہم کے دوران کئی پولیو ورکرز اور سکیورٹی اہلکاروں نے فرائض کی انجام دہی میں جانوں کا نذرانہ پیش کیا ہے، پولیو کے خاتمہ میں بل اینڈ ملینڈا گیٹس کی خدمات کو فراموش نہیں کیا جا سکتا، انسداد پولیو کے راستے میں آنے والی رکاوٹوں کو آڑے نہیں آنے دیا جائے گا۔

ان کا مزید کہنا تھا کہ انسداد پولیو کا عالمی دن ڈاکٹر جونس سالک کی سالگرہ کی یاد میں منایا جاتا ہے جن کی سربراہی میں 1950ء کے عشرے کے اوائل میں انسداد پولیو ویکسین کی تیاری عمل میں لائی گئی، ویکسین کی بدولت دنیا بھر میں 2 کروڑ سے زائد افراد کو پولیو کے موذی مرض سے نجات ملی، اگر یہ ویکسین تیار نہ کی جاتی تو آج دنیا میں صورتحال مختلف ہوتی۔ انہوں نے کہا کہ پاکستان میں 1988ء میں انسداد پولیو مہم کا آغاز ہوا، اس وقت دنیا کے 125 ممالک میں پولیو کا وائرس موجود تھا اور ساڑھے تین لاکھ سے زائد بچے پولیو سے معذور ہو چکے تھے، آج 99 فیصد دنیا سے پولیو کا خاتمہ ہو چکا ہے اور پاکستان اور افغانستان دو ایسے ممالک ہیں جہاں پولیو کے کیسز سامنے آ رہے ہیں، پاکستان نے پولیو کے خاتمہ کیلئے بھرپور اقدامات کئے ہیں، 2022ء میں پولیو سے متاثرہ بچوں کی تعداد 22 تھی جو اب کم ہو کر صرف 4 رہ گئی ہے، پاکستان میں ترقیاتی شراکت داروں کے ساتھ مل کر انسداد پولیو اور زچہ و بچہ کے علاج کیلئے مؤثر اقدامات کئے جا رہے ہیں۔

انہوں نے کہا کہ ان علاقوں میں جہاں پولیو کے کیسز سامنے آتے ہیں وہاں پر غذاء کی فراہمی، علاج کی بہتر سہولیات اور صفائی کی صورتحال کو بہتر بنانے کیلئے کوششیں جاری ہیں، پاکستان کا پولیو پروگرام انتہائی مؤثر ہے اور اس پروگرام کی بدولت ملک میں بچوں کو پولیو کے وائرس سے بچانے میں کامیابی ہوئی ہے، اس مقصد کیلئے پولیو ہیلتھ ورکرز، سکیورٹی اہلکاروں کی خدمات اور قربانیاں قابل تحسین ہیں جنہیں مشکل حالات میں بھی اپنی ذمہ داریاں ادا کرنا پڑتی ہیں لیکن پولیو کے خاتمہ کیلئے ان کا عزم متزلزل نہیں ہوتا۔

نگران وزیراعظم نے کہا کہ 2011 کے بعد سے ہمارے بہت سے پولیو ورکرز نے ملک سے پولیو کے خاتمہ کی کاوشوں کے دوران قربانیاں دی ہیں اور اپنی آئندہ آنے والی نسلوں کے تحفظ کیلئے اپنی جانوں کا نذرانہ پیش کیا ہے، اس کے علاوہ فرائض کی انجام دہی کے دوران کئی پولیو ورکرز زخمی بھی ہوئے، اس اہم قومی مقصد کے حصول کیلئے ہم ان کے اہلخانہ کے ساتھ مکمل یکجہتی کا اظہار کرتے ہیں۔ ہمیں اس چیز کا احساس کرنا ہو گا کہ دنیا میں پولیو کے مکمل خاتمہ کے حوالہ سے 2024ء میں ہمارے اوپر بڑی بھاری ذمہ داری عائد ہو رہی ہے اور اس کیلئے ہمیں ہر طرح کے اقدامات کرنا ہوں گے تاکہ پولیو کا پھیلاؤ روکا جا سکے، پولیو کے خاتمہ کیلئے ہر بچے تک ویکسین کی فراہمی کو یقینی بنانا ہو گا۔ 

روزنامہ پاکستان کا واٹس ایپ چینل جوائن کرنے کیلئے یہاں کلک کریں۔

#Live: PM @anwaar_kakar attends a ceremony in Islamabad https://t.co/FopSIlBfpT

— Radio Pakistan (@RadioPakistan) October 24, 2023