روس کی جدید ترین الیکٹرک کار کمپنی کی جانب سے بڑا اعلان

روسی کمپنی موٹر انویسٹ (MotorInvest) نے جدید ترین الیکٹرک کار ’ایولوٹ آئی اسکائی‘ کی پیداوار شروع کر دی ہے۔

غیر ملکی میڈیا رپورٹس کے مطابق روس کی الیکٹرک گاڑیاں بنانے والی کمپنی موٹر انویسٹ نے اپنے جدید ترین SUV ماڈل Evolute i-SKY کی پیداوار شروع کر دی۔

یہ جدید الیکٹرک گاڑی ایک درمیانے سائز کی کراس اوور ایس یو وی ہے، جو ایک ہی چارج پر 500 کلو میٹر سے زیادہ چلتی ہے، اس گاڑی کی اسمبلنگ مغربی روس کے شہر لپٹسک میں جاری ہے۔

کمپنی کی ویب سائٹ پر کہا گیا ہے کہ یہ کار آرڈر کے لیے مارکیٹ میں پہلے ہی سے دستیاب ہے، جس کی قیمت تقریباً 4 ملین روبل (45 ہزار ڈالر) سے شروع ہوتی ہے۔

موٹر انویسٹ کمپنی نے ستمبر 2022 میں روس میں الیکٹرک گاڑیوں کی پروڈکشن شروع کی تھی، اس کے ایولوٹ برانڈ میں i-Pro sedan اور i-JOY کمپیکٹ کراس اوور، اور i-VAN منی وین جیسی گاڑیاں بھی شامل ہیں۔

یہ تمام کاریں ڈونگ فینگ اور سوکون کے تیار کردہ چینی ماڈلز پر مبنی ہیں، روسی کمپنی نے کہا ہے کہ اسے توقع ہے کہ اس سال 7,500 کاریں اور 2024 میں 12 ہزار گاڑیاں فروخت ہو جائیں گی۔

جس فیکٹری میں یہ کاریں اسمبلی کی جا رہی ہیں اس میں سالانہ 1 لاکھ سے زیادہ الیکٹرک کاریں بنانے کی صلاحیت ہے۔