آسٹریلیا کے خلاف ٹیسٹ سیریز سے قبل پاکستان کرکٹ ٹیم کے لیے ایک پریشان کن خبر سامنے آئی ہے، اسپنر ابرار احمد پاؤں میں تکلیف کا شکار ہوگئے۔
پاکستان کرکٹ ٹیم اور آسٹریلیا کی پرائم منسٹر الیون کے درمیان کینبرامیں جاری چار روزہ میچ کے تیسرے دن پاؤں میں تکلیف کے باعث ابرار احمد نے صرف 8 اوورز کرائے اور انہیں میدان سے باہر جانا پڑا۔
پی سی بی کا کہنا ہے کہ ابرار احمد کا ایم آر آئی اسکین کرایا جا رہا ہے،میڈیکل پینل رپورٹس کا جائزہ لینے کے بعد مزید تفصیلات بتائی جائیں گی۔
پاکستان کرکٹ بورڈ کے مطابق 25 سالہ ابرار احمد کو ایم آر آئی اسکین کے لیے بھیج دیا گیا ہے ۔ ابرار نے چار روزہ میچ میں اب تک 27 اوورز کرائے ہیں۔
پاکستان کرکٹ ٹیم آسٹریلیا کے خلاف 14 دسمبر سے ٹیسٹ سیریز کھیلے گی۔
تین میچوں کی سیریز کا پہلا ٹیسٹ پرتھ میں کھیلا جائے گا جبکہ دوسرا ٹیسٹ 26 دسمبر سے میلبرن اور سیریز کا تیسرا اور آخری ٹیسٹ میچ 3 جنوری کو سڈنی میں کھیلا جائے گا۔
Source link
www.suchtv.pk