خاتون ٹیچر پر مبینہ تشدد ایم کیو ایم نے صداقت حسین کی رکنیت معطل کردی

کراچی (ڈیلی پاکستان آن لائن)ایم کیو ایم پاکستان کی مرکزی کمیٹی نے ڈسپلنری ایکشن لیتے ہوئے اورنگی ٹاؤن میں امتحانات میں نقل کرانے کے لیے خاتون ٹیچر پر تشدد کرنے کے واقعے کی ویڈیو سوشل میڈیا پر وائرل ہونے پر صداقت حسین کی تنظیم کی بنیادی رکنیت معطل کر دی۔

ایم کیو ایم کے ترجمان کا کہنا ہے کہ اورنگی ٹاؤن کے اسکول میں پیش آنے والے واقعے کی تحقیقات کا آغاز کر دیا ہے۔

ترجمان ایم کیو ایم کے مطابق ایم کیو ایم پاکستان نقل مافیا کے خلاف سب سے مضبوط آواز ہے۔ایم کیو ایم کسی بھی کارکن کو یہ اجازت نہیں دیتی کہ وہ کسی غیر قانونی سرگرمی کا حصہ بنے۔مرکزی کمیٹی نے واقعے کا نوٹس لیتے ہوئےتحقیقاتی کمیٹی تشکیل دے دی ہے۔

واضح رہے کہ گزشتہ روز اورنگی ٹاؤن کے ایک اسکول میں ایم کیو ایم رہنما صداقت حسن کی جانب سے نقل کرانے کے لیے خاتون ٹیچر کو ہراساں و تشدد کرنے کی ویڈیو سوشل میڈیا پر وائرل ہوئی تھی۔