پنجاب یونیورسٹی ایشیا میں سب سے زیادہ ترقی کرنے والا ادارہ بن گیا

واشنگٹن /لاہور(ڈیلی پاکستان آن لائن)عالمی ادارے کیو ایس نے پنجاب یونیورسٹی کو ایشیا میں سب سے زیادہ ترقی کرنے والا ادارہ قرار دے دیا۔

عالمی رینکنگ میں بے مثال ترقی پر وائس چانسلر پنجاب یونیورسٹی ڈاکٹر خالد محمود نے پریس کانفرنس میں بتایا کہ عالمی ادارے کیو ایس نے ایجو ڈیٹا سمٹ کا واشنگٹن میں انعقاد کیا ہے، پاکستان ایمبیسی امریکہ نے سمٹ میں ایشیا میں سب سے بہتر ترقی کرنے والے کا ایوارڈ وصول کر لیا ہے،  5 سالوں میں پنجاب یونیورسٹی نے چین، بھارت، جاپان، جنوبی کوریا، سنگاپور کی جامعات کا مقابلہ کر کے یہ اعزاز حاصل کیا،پنجاب یونیورسٹی نے وسائل کے اعتبار کے کئی گنا بڑی یونیورسٹیوں کو پیچھے چھوڑ کر پوزیشن حاصل کی۔

پریس کانفرنس میں چیئرمین رینکنگ کمیٹی ڈاکٹر عثمان اعوان، سیکرٹری ڈاکٹر شفیق الرحمان نے بھی شرکت کی۔

وائس چانسلر پنجاب یونیورسٹی کا مزید کہنا تھا کہ یونیورسٹی کی عالمی رینکنگ میں بھی حیرت انگیز اضافہ ہوا ہے، نئی رینکنگ میں پنجاب یونیورسٹی دنیا کی 570 ویں بہترین یونیورسٹی قرار پائی ہے، گزشتہ سال کی نسبت پنجاب یونیورسٹی کی رینکنگ میں 170 درجے کی بہتری آئی ، گزشتہ رینکنگ میں پنجاب یونیورسٹی دنیا کے بہترین 740-750 اداروں میں شامل تھی، ایک سال میں عالمی رینکنگ میں 170 درجے بہتری حاصل کرنا غیر معمولی ہے، رینکنگ میں بہتری پر پنجاب یونیورسٹی کے اساتذہ، انتظامیہ اور طلباء مبارکباد کے مستحق ہیں، پنجاب یونیورسٹی رینکنگ کمیٹی نے دن رات محنت کی، گریجوایٹس کو ملازمت کے حصول کی کیٹگری میں پنجاب یونیورسٹی نے پاکستان میں نمبر 1 پوزیشن حاصل کی۔

اس موقع پر چیئرمین رینکنگ کمیٹی ڈاکٹر عثمان اعوان کا کہنا تھا کہ حکومت مناسب فنڈنگ کرے تو پاکستان کی جامعات مزید بہتر پرفارم کر سکتی ہیں۔



Source link
dailypakistan.com.pk

اپنا تبصرہ بھیجیں