روسی خلا باز نے خلا میں سب سے زیادہ وقت گزارنے کا ریکارڈ قائم کر دیا

روسی خلا باز اولیگ کونونینکو نے خلا میں سب سے زیادہ وقت گزارنے کا عالمی ریکارڈ قائم کردیا ہے۔

غیر ملکی خبر رساں ادارے کی رپورٹ کے مطابق اولیگ کونونینکو نے 878 دن یا تقریباً ڈھائی سال تک خلا میں سب سے زیادہ وقت گزارنے کا عالمی ریکارڈ بنایا ہے۔

روس کی خلائی کارپوریشن کے مطابق روسی خلا باز نے 4 جنوری کو مقامی وقت رات 8 بجکر 30 منٹ پر اپنے ساتھی روسی خلاباز گیناڈی پڈالکا کا ریکارڈ توڑا ہے۔

گیناڈی پڈالکا نے 2017 میں 878 دن، 11 گھنٹے، 29 منٹ اور 48 سیکنڈ خلا میں گزارے تھے۔ 59 سالہ کونونینکو نے زمین سے خلا کی 5 ویں پرواز کے دوران یہ ریکارڈ اپنے نام کیا۔

بین الاقوامی خلائی اسٹیشن (آئی ایس ایس) سے ایک انٹرویو میں انہوں نے کہا تھا کہ ’مجھے اپنی تمام کامیابیوں پر فخر ہے، لیکن مجھے سب سے زیادہ فخر ہے کہ خلا میں انسانی قیام کی کل مدت کا ریکارڈ اب ایک روسی خلا باز کے پاس ہے‘۔

اولیگ کونونینکو اس وقت خلا میں ہی موجود ہیں، ان کا یہ سفر ستمبر 2024 میں ختم ہوگا، اُس وقت تک وہ خلا میں ایک ہزار 110 دن گزار چکے ہوں گے۔

یورپی خلائی ایجنسی کے مطابق انہوں نے اپنے خلائی کیریئر کا آغاز بطور انجینئر کیا تھا اور 34 سال کی عمر میں اس وقت ایک خلاباز کے طور پر تربیت شروع کی جب وہ آئی ایس ایس پروگرام کے لیے منتخب کردہ گروپ میں شامل ہوئے۔ انہوں نے پہلی خلائی پرواز اپریل 2008 میں کی تھی اور خلا میں 200 دن تک گزارے تھے۔

انہوں نے 16 سال کے دوران میں 5 بار خلا کا سفر کیا ہے، روسی خلا باز نے کہا کہ جب میں گھر واپس جائیں گے تو مجھے احساس ہوگا کہ سینکڑوں دنوں سے میرے بچے اپنے والد کے بغیر بڑے ہو رہے ہیں، یہ وقت مجھے کوئی واپس نہیں دے سکتا۔